Æji hvað ég er þreytt og sybbin.

Í gærkvöldi lagði ég leið mína út á Hvammstanga, ásamt fríðu föruneyti (Óli, Eyrún og Sara). Förinni var heitið í félagsheimilið, þar sem að hljómsveitin Buff lék fyrir dansi. Þar var saman kominn múgur og margmenni og heilsaði ég fólki hægri vinstri. Það sem kom mér mest á óvart var að allt í einu stóð Inga Birna beint fyrir framan mig! Geggjað að hitta hana, enda langt síðan síðast. Binni og Gísli voru líka þarna og tókum við Gísli góðan snúning. Þarna voru nú líka nokkrir fleiri Skagfirðingar og Austur-Húnvetningar, en mest megnis var þetta heimafólk. Ég hitti líka Sindra, Valda, Danna og Atla. Þeir voru helsleipir í hermannatjaldi uppi í Hvammi. Valdi og Atli nýkomnir með tattú, alveg ótrúlega harðir. En þetta ball var bara snilld í alla staði og ég skemmti mér þrusuvel

Á föstudaginn fór ég með Óla og Eyrúnu í Borgarvirki á tónleika með Röggu Gísla. Þar var fjöldinn allur af fólki og ótrúlega góð stemming sem myndaðist á þessum sögufræga stað. Frábært veður, lopapeysufílingur, kerti, kyndlar og tónlist. Verður það betra? Eftir tónleikana fór Eyrún út á Tanga í bílabíó, en við Óli fórum bara heim, enda þurfti ég (sem fyrr) að vakna snemma.

Ég var svo ótrúlega forsjál að baka pizzur í gær, og geyma eina þangað til í dag. Tók hana með mér í nesti í vinnuna. Ég var svo þreytt í morgun að ég kveikti á pípinu (tæki sem að pípir þegar einhver opnar dyrnar) og hreiðraði um mig í stólunum. Þar sem að það er enginn sófi hérna verður maður að nota það sem maður hefur. Ég skammast mín dálítið að segja frá því að ég dottaði í ófá skiptin á bilinu 10-12. Þá reif ég mig upp og fékk mér í svanginn.

Hérna eru myndir af "skrifstofunni" á Byggðasafninu, svona fyrir þá sem hafa enn ekki komið þangað

Svona var svo "rúmið" mitt

Ég var samt svo ótrúlega bitur í hádeginu að það var leitun að öðru eins. Justin Gatlin féll á lyfjaprófi Af hverju hnegist ég svona til að halda með íþróttamönnum sem falla á lyfjaprófum?? Ég dýrkaði Tim Montgomery! Skrifaði ritgerð um hann í 9. bekk og svo búmm féll hann á lyfjaprófi. Ég sem var farin að hlakka svo mikið til að sjá Gatlin hlaupa í Brussel!

Meira um Gatlin hérna: http://mbl.is/mm/sport/frett.html?nid=1215153
og hérna: http://mbl.is/mm/sport/frett.html?nid=1215219

Myndir síðan í Borgarvirki og af ballinu má finna hérna vinstra megin.

Spurning dagsins: Úr hvaða lagi er titillinn? (Þetta fer að verða fastur liður)

Guðrún - glöð og vonsvikin

Á ferð með Birni Bergmann, kennara, Blönduósi

Á þessum fleigu orðum byrjar ein skráningarbókanna sem við Sara erum búnar að skrifa upp í tölvu af miklum móð síðustu daga. Í dag er ég reyndar búin að vera afspyrnu léleg við það, en þegar þessu bloggi líkur mun ég sökkva mér ofan í sagnfræðina og skrá meira. Það er samt ákaflega erfitt að ráða í sumt af þessu, þar sem að skruddan er komin til ára sinna (skrifuð 1957) og í henni má finna ótrúlegt magn óskiljanlegra orða.

Linkin Park ætla að koma með disk í lok árs. Veiveivei og klappklapp fyrir því. Langar mest á tónleika með þeim. Ég, Arna og Sara skellum okkur næsta sumar þó við þurfum að ferðast á hjara veraldar

Annars er ég hress. Unglistahátíðin í fullum gangi og ég ekki búin að sjá neitt af henni, því miður. Ætlaði á setningarathöfnina, en pabba datt í hug að taka sýni úr kúnum (nenni ekki að útskýra) svo við vorum mun lengur að mjólka heldur en venjulega. Í ofanálag var ég ekki með úrið mitt, en það er týnt enn eina ferðina. Ég hef samt engar áhyggjur, því ég get ekki talið skiptin sem það hefur týnst, en einhvern veginn ratar það alltaf heim aftur. Svo vaknaði ég klukkan 6 í gærmorgun og var orðin svo þreytt og slöpp um kvöldið að ég fór bara að sofa í staðinn fyrir að fara á Melló Músíka sem var á Þinghúsinu. Þar var víst múgur og margmenni og missti ég af góðum tónleikum, er mér sagt. Er ég ekki nema temmilega döpur yfir því, þar sem að rúmið mitt er einkar þægilegur staður. Stefnan er engu að síður sett á Borgarvirki í kvöld, en þar mun Ragga Gísla troða upp ásamt einhverjum fleirum. Lopapeysufílingur. Nema það verði bara gott veður Hvet alla til að tékka á http://unglist.forsvar.is

Svo er ball á morgun og ætla ég að skella mér á það, galvösk að vanda. Er reyndar að vinna daginn eftir, en það verður bara að hafa það. Sindri, Valdi, Atli og Danni ætla að tjalda á Hvammstanga og skella sér á ball Hvet ég alla til að slást í hópinn og gera slíkt hið sama.

Í gær kom "frægur maður á Íslandi" hingað á safnið. Getið þið sagt mér hvað kappinn heitir og fyrir hvað hann er frægur?

Nafnbótaveiting? Jæja, kannski það.

Besta "comeback'ið": Sindri www.folk.is/bylgja_rokkar og Valdi www.blog.central.is/sirvaldi fyrir að snúa aftur af sjónum og halda blogginu áfram

Duglegasti bloggarinn: Ja, ekki ætla ég að velja sjálfa mig, þannig að ég segi Berglind á www.berglindgunnars.blogspot.com Alltaf gaman að lesa bloggin hennar og þau koma frekar reglulega, þannig að hún er vel að tiltlinum komin

Duglegasti commentarinn: Til að hafa þetta lýðræðislegt þá taldi hvað hver var búinn að kommenta oftast frá síðustu nafnbótaveitingu og þar var Arna ótvíræður sigurvegari með 8 comment. Fast á hæla hennar komu Sindri og Konni með 6

Nýliði "vikunnar": Eru að þessu sinni í fleirtölu. www.blog.central.is/groa_helga En þetta eru þær systur, Guðrún Gróa og Helga Margrét

Dvala-bloggarinn: Þórveig. Held að bloggið hennar sé lagst í sumardvala www.blog.central.is/4u2u

Laumu-bloggarinn: Sara! http://merin.bloggar.is Er bara alveg sammála Örnu Þrándar með það

Þeir sem hafa ekk heyrt lagið Undir Sólinni með Hönnu Guðnýju eiga að drífa í því strax. Takk fyrir

Spurning dagsins: Úr hvaða lagi er titilinn. Giskiði endilega

Guðrún Eik - safnalúðinn

Það er bara allt að gerast.

Í fyrradag fjölgaði aldeilis á bænum. Þrír Pólverjar bættust í hópinn sem fyrir er heima. Þeir verða samt bara í viku eða svo, en þá halda þeir suður í Grímsnes að setja saman sumarbústaði. Upphaflega áttu þeir að fara beint þangað, en húsin eru víst eitthvað lengur á leiðinni en talið var og þess vegna eru þeir heima. Þeir sem bættust við heita Adam, Daniel og Tamek. Ég held að Pólverjar séu bara með sætasta fólki sem ég veit um. Fyrir þeim er þetta bara stórt ævintýri og þeir Elska Ísland. Vatið er svo tært og náttúran yndisleg. Alveg krúttlegastir. Einn þeirra nýju (Adam) talar hrafl í ensku, svo að það er hægt að gera sig nokkurn veginn skiljanlegan án þess að hljóta tilnefningu til Óskarsverðlauna. Þeir eru allavegana alltaf brosandi og kátir og það smitar út frá sér. Kannski alla nema mömmu, því að hún er ekki alveg sátt við að vera með 8-13 manns í mat á öllum tímum sólarhringsins. (Ég, Óli, Eyrún, mamma, pabbi, Biggi, Aron, Jarek, Andzei, Andzei, Adam, Daniel og Tamek. Ég veit að ég gerði Andzei tvisvar, en það er ekki vegna þess að ég sé eitthvað treg, heldur eru þeir tveir)

Þetta hefur reyndar skapað smá vandræði fyrir mína parta, og eru gardínur í þvottahúsið og lás á þvottahúshurðina orðin efst á mínum óskalista. Ég var að fara út í gær með Eyrúnu og eins og endra nær skiptum við um föt í þvottahúsinu. "Vonum bara að Pólverjarnir labbi ekki fram hjá rétt á meðan" sagði ég í gríni, en viti menn. Ég hafði ekki sleppt orðinu þegar glitti í einn þeirra. Ég fleygði mér í gólfið með buxurnar í höndunum og tókst einhvern veginn að smokra mér í þær, liggjandi á gólfinu. Þar skall hurð nærri hælum. Eyrún hló mikið að þessu og bennti mér á að kannski væru þeir á leiðinni inn að þvo sér um hendurnar. Ég náfölnaði, enda frekar fáklædd ennþá og ætlaði að flýta mér í fötin, þegar tekið var í húninn og hurðin opnaðist. Mig langaði að deyja. Ég reif næstum bolinn minn í flýtinum og skammaðist mín ótrúlega, til þess eins að komast að því að þetta var bara mamma

Í morgun ætlaði ég svo að sofa út. (Alveg til 9). Stundvíslega klukkan 8 voru Pólverjarnir komnir upp á þak. Þeir eru að grunna og skrapa þakið og búa það undir að vera málað. Svo voru þeir að brolta með stiga og alls konar bras og braml sem fylgdi þessu. Ég glaðvaknaði að sjálfsögðu og þar með var lúrinn búinn. Ég tók þá bara fyrsta bindi Hringadróttinssögu og gluggaði í það, áður en ég þurfti að fara fram úr.

Eyrún uppgötvaði nokkuð þegar hún var að skoða myndirnar af ballinu...

Óli og Danni.....

....eða Lloyd og Harry??

Sláandi svipir þarna

Ball næstu helgi á Hvammstanga. Er reyndar að vinna, en læt það ekki á mig fá. Hverjir ætla að mæta?

Spurning dagsins: Úr hvaða lagi er titillinn. (Þetta ætti að vera auðvelt)

Guðrún Eik - Pólska?

Athugið! Athugið! Mannsefni óskast.

Ég óska eftir manni til að giftast. Viðkomandi verður að vera myndarlegur, (Heath Ledger eða Colin Farrell er fínt að miða við), fyndinn, skemmtilegur, gáfaður (ekki vil ég eitthvað grænmeti), geðgóður, hafa góða menntun (góð menntun gefur góð laun), barngóður, traustur, (ekkert framhjáhald hér á bæ), finnast gaman að versla, eiga góða og yndislega fjölskyldu, finnast ég aldrei vera lengi að taka mig til, leyfir mér að hafa fjarstýringuna af sjónvarpinu (hún verður mín), segja alltaf réttu hlutina, vera réttlátur og sanngjarn og að sjálfsögðu, dýrka mig. Já, eitt annað lykilatriði, hann verður að vera opinn fyrir þeim möguleika að gerast bóndi á Tannstaðabakka einn góðan veðurdag.
Áhugasamir hafi samband við undirritaða eftir 4-5 ár. Hægt verður að semja um undantekningar.

Guðrún - fer auðveldu leiðina

Sindri vildi endilega fá eitt hnittið blogg fyrir helgina. Jæja, ég veit ekki hversu hnittið þetta verður, en það er allavegana blogg.

Ég er nýkomin úr tveggja daga "fríi". "Fríi" vegna þess að miðvikudaginn svaf ég af mér og gærdeginum var varið í náttfötunum fyrir framan imbann. Ég var sem sagt veik og er eiginlega ennþá. Hálsinn á mér er eins og grófur sandpappír, sem gerir mér frekar erfitt um vik að ætla að tala við fólk. Þá er það líklega bara jákvætt að enginn hafi komið á safnið í dag, því ég ætti frekar erfitt með að gera mig skiljanlega. Það er frekar langt síðan ég var veik síðast. Get því miður ekki sagt að ég hafi saknað þess.

Í sjónvarpsglápinu í gær sá ég gamalt brot úr Kastljósinu. Þar voru þau að rabba við lækni og svo kallaðan heilara. Þarna voru sem sagt læknavísindin að þræta við hið dulræna. Ég fór aðeins að spá í þetta og komst að þeirri niðurstöðu að það er alltaf svoleiðis. Alltaf þegar eitthvað dularfullt kemur fram, þá stíga fram vísindamenn og læknar sem mótmæla hástöfum. Það er eins og menn vísindanna geti ekki trúað á hið dulræna í heiminum. Skipta mætti fólki í 2 hópa. Þá sem aðhyllast vísindi og þá sem að trúa án þess að hafa vísindalegar sannanir fyrir því. Er ég þá eitthvað skrítin? Jú, ég er á náttúrufræðibraut og ætla að fara í framhaldsnám í líffræði. Ég les Lifandi Vísindi og myndi falla nokkuð vel inn í þennan hóp "vísindamanna". Samt sem áður held ég að það sé fullt af hlutum í heiminum sem ekki er hægt að skilgreina á vísindalegan hátt. Ég veit ekki nákvæmlega hvað heilarar gera, en ef fólki finnst það hafa góð áhrif þá getur það varla verið slæmt. Þó að vísindi hafi ekki svar við öllu, þá þýðir það ekki að svarið sé ekki til.

Núna kemur saga. Ég hef lengi verið slæm af vöðvabólgu. Ég man reyndar ekki alveg hvenær það byrjaði, en það eru mörg ár síðan. Á tímabili í 9. bekk var ég mjög slæm og fór til læknis, til að reyna að ráða bót á þessu. Læknirinn gerði sér lítið fyrir og sprautaði mig með sterum í herðarnar og hálsinn til að ná bólgunni niður. Ég var góð í 2 daga, en versnaði svo aftur. Mömmu leist nú ekkert á að ég færi aftur til læknisins til að fá meiri stera, því að augljóslega hafði það ekki lagað neitt, heldur aðeins slegið á sársaukann í 2 daga. Ég talaði um þetta við Laufeyju og hún sagði mér frá manni sem hún hafði farið til og kallaði sig Spjaldhryggs og höfuðbeina sérfræðing. Hún mælti með honum og hvatti mig til að prufa hann. Ég ákvað að slá til og fór að hitta hann um það bil mánuði seinna. Laufey hafði lýst þessu fyrir mér, en ég vissi samt eiginlega ekki við hverju ég ætti að búast. Maðurinn (sem ég man því miður ekki hvað heitir) var á sextugsaldri, með hvítt hár og mjög afslappaður og rólegur í fasi. Ég lagðist upp á bekk hjá honum og hann fór að pota í mig og tosa mig til, tautandi fyrir munni sér. Á endanum tók hann um ristarnar á mér, hristi þær dálítið til og tosaði sitt á hvað. "Já ertu svona skökk" tautaði hann og hélt áfram að tosa. Þegar hann virtist ánægður bað hann mig að kíkja á fæturnar á mér. Annar þeirra var allt í einu orðinn mun styttri en hinn! Hann útskýrði fyrir mér að ef maður beitir sér rangt þá myndast spenna í vöðvunum, sem verður til þess að líkaminn skekkist. Ég var hálf skelfd að fylgjast með fótunum mínum, sem allt í einu voru ekki jafn langir. Ég get samt alveg svarið fyrir það að hann ýtti ekki öðrum til þannig að annar virtist lengri. Næst bað hann mig að leggjast aftur og slaka vel á. Það var nú frekar auðvelt, því að fyrir utan einhver róandi hljóð sem spiluð voru á geisladisk var dauðaþögn í herberginu. Hann setti svo hendurnar undir bakið á mér, hallaði sér fram og lokaði augunum. Fljótlega var hann farinn að anda þungt, eins og hann væri hálf sofandi. Hann færði hendurnar samt til reglulega. Þær fóru undir fæturna og stóran hluta af bakinu. Þegar tíminn var að verða búinn sagði hann að hann réði ekki við þetta allt núna, ég yrði að panta annan tíma. Það gerði ég. Þegar ég labbaði út var ég með höfuðverk og dauðþreytt.
Ég hlakkaði nú ekkert svakalega til næsta tíma, miðað við hvernig ég var eftir þann fyrri. 2 vikum síðar var ég samt mætt aftur til kallsins. Núna tosaði hann hvorki né potaði þegar ég lagðist á bekkinn, heldur setti hann rólegu hljóðin á, settist í stól við enda bekksins og setti hendurnar undir axlirnar og herðarnar á mér. Eftir smá stund lagði hann aðra höndina á höfuðið á mér og hallaði því. Þetta var eitt það undarlegasta sem ég hafði upplifað. Ég var með dúndrandi höfuðverk, verk í hálsinum, herðunum og öxlunum, en einmitt á þessum svæðum var vöðvabólgan hvað mest. Hann sneri mér svo í hina áttina og gerði nákvæmlega það sama þeim megin. Svo setti hann hendurnar undir hálsinn á mér og ég heyrði hvað andardrátturinn var þungur. Það var eins og hann hefði "fallið í trans" eða eitthvað. Ætli ég hafi ekki verið í svipuðu ástandi, þrátt fyrir sársaukann. Þetta var ótrúlega skrítið. Eftir heila eilífð (að því er mér fannst) dró hann hendurnar til sín og ég rankaði við mér. Ég stóð upp og það var eins og að vakna eftir besta nætursvefn sem ég hef fengið. Hugsunin var skýr, sjónin skörp og líkaminn fullur af lífi. Ég var engan veginn þreytt og vöðvabólgan var horfin. Mér hefur aldrei á ævinni liðið svona vel og efa að mér muni nokkurn tímann líða svona vel aftur.

Jæja, þessi saga var nú heldur lengri en ég bjóst við. Vöðvabólgan er reyndar farin að herja á mig aftur núna og ég er að íhuga að fara bara aftur í svona. Fannst það alveg þess virði. Vona bara að fólki finnist ég ekki stórskrítin eftir þennan lestur

Annars eru komnar myndir út um allt af ballinu. Hérna eru nokkrir linkar:
Guðrún Gróa: http://www.blog.central.is/gudrungroa?page=viewPage&id=953407
Erla Sif: http://www.123.is/album/display.aspx?fn=onlyus&aid=1394876731
Pálmi Þór: http://palmithor.bloggar.is/album/11807/

Ég ætti í rauninni að hafa "vikunnar" núna, en held að þetta sé orðið alveg nógu langt

Guðrún Eik - skrítin?

Ein feit helgi afstaðinn og ég er mætt enn á ný á mitt ástkæra Byggðasafn.

Signý, Arna og Ragnhildur komu til mín á laugardaginn og ég byrjaði á því að gefa þeim köku og taka þær í skoðunnarferð. Píla kom með og kattarskríflið líka. Ég sýndi þeim út um allt og var Arna mjög hrifin af kjúklingunum Eitthvað tók þetta nú á, því þegar við komum inn lagði Signý sig, Ragnhildur sofnaði inni í stofu og ég og Arna skriðum upp í sófa. Um kvöldið grillaði Óli bró svo fyrir okkur og það var tekið á því. Ég bauð þeim svo upp á vanilluís með berjum og heitri súkkulaðisósu í eftirmat og ef jólin eru undanskilin held ég að ég hafi aldrei borðað svona mikið! Við drifum okkur svo í pottinn og þaðan niður í hjólhýsi. Við ætluðum að vera í hústjaldinu, en það fauk og við nenntum ekki að tjalda aftur. Um rúmlega 11 héldum við af stað norðaustur á bóginn og lenntum á Blönduósi um miðnættið. Fljótlega fylltist húsið og voru yfir 600 manns þarna inni! Frekar mikil stappa þarna inni. Ég held ég hafi aldrei heilsað eins mörgum eða knúsað jafn marga á einu balli. Alveg æðislegt að hitta alla aftur. Ég skemmti mér alveg stórvel á þessu balli og það var alger snilld, ef að sirka 2 mínútur eru undanskildar Stuðmenn stóðu undir nafni og héldu uppi góðu stuði. Birgitta stóð sig bara vel og Stefán Karl var snilld. Ég tók myndavélina með og smellti nokkrum af, þrátt fyrir að helmingjur myndanna hafi verið yfirlýstur eða svartur. Þarf virkilega að fara að stilla þessa myndavél..

Bolurinn minn liggur ennþá uppi í sumaherbergi. Hef ekki verið nógu dugleg með hann upp á síðkastið, en það er svona að vera vinnandi manneskja. Þarf samt endilega að drífa í þessu, þar sem mér er meinilla við að byrja á einhverju sem ég get ekki klárað.

Ætli þetta sé ekki gott í bili, læt nokkrar myndir fylgja, þó að þær geri stuðinu og stemmingunni engan veginn nógu góð skil.

Knús vikunnar fær Binni fyrir að vera bestur og gerast bjargvættur á ögurstundu

Fleiri myndir undir "Útihátíðin Sigfús og Stuðmannaball" hérna vinstra megin

Guðrún Eik - Ég skemmti mér

Ég er að fara í þriggja daga frí. Sem betur fer, því að ég held að þessi vinna sé farin að hafa áhrif á geðheilsuna. Þetta var allt einhvern veginn miklu skárra í minningunni. Og ekki skemma launin fyrir. En ég mun engu að síður hugsa mig vandlega um næsta sumar. En hvað er maður svo sem að kvarta? Margir kostir í þessu líka og ekkert víst að ég hefði það betra annars staðar.

Pálmi átti afmæli í gær. Til hamingju með það enn eina ferðina :*

Um daginn losaði ég samt vel um streitu, sleppti fram af mér beislinu og hvarf 8 ár aftur í tímann. Ég fór sem sagt út í Reykjaskóla til Bigga að horfa á Þýskaland - Portúgal, því að heimska áskriftin að Sýn rann út daginn áður. Þegar leikurinn var búinn fór Arnór á trampólínið og eftir smá stund ákvað ég að fara aðeins út líka. Ég fór á trampólínið með Arnóri og það var bara eitt stórt hláturskast!! Arnór kenndi mér ýmsa trampólín leiki, hver öðrum skemmtilegri og ég gersamlega veltist um af hlátri. (Fyrir þá sem ekki vita er Arnór 12 ára) Þetta var alger snilld og ég stefni á að skella mér aftur fljótlega

Í gær var ég mönuð af 12 ára strák að ná mér í kærasta á ballinu um helgina. (Já, þið sem lögðuð saman tvo og tvo, ég er ennþá að tala um Arnór). Vissi ég ekki hvaðan á mig stóð veðrið og sat ég og gapti í smá stund áður en ég meðtók það sem drengurinn hafði sagt. Þá sprakk ég úr hlátri. Fyrr um daginn hafði hann spurt mig ítrekað hvort að Arnar Ingi væri kærastinn minn, en ég var að tala við hann á msn. Ég var farin að halda að Arnór væri orðinn örvæntingarfullur fyrir mína hönd og hefði áhyggjur af því að ég gengi ekki út  Fyrr í vikunni hafði hann samt bölvað rómantískum myndum í sand og ösku: "Endar allt í einhverju helv. kossaflensi!!" Alveg yfir sig hneykslaður.

Svo styttist óðum í helgina. Hún verður best Hlakka til

Guðrún Eik - Bara 75 mín

Krikket er alveg málið

Já það gerist nú varla rólegra. Sara farin að dotta hérna í hinum tölvustólnum og engir gestir inni. Við þurfum reyndar að þrífa klósettin á eftir (vei) og svo skúraði ég slatta  í morgun. "Geðveikt dugleg"

HM búið og allir/margir alveg vitlausir út í Zidane. Maður gerir náttúrulega ekki svona, en mér fannst hann samt ekki tapa kúlinu. Hann er alltaf svalur og mig langar mjög að vita hvað það var sem að reitti hann svona til reiði, því eins leikreyndur maður og hann er, lætur nú ekki einhverja smámuni fara í skapið á sér. Veit hreinlega ekki hvort er óíþróttamannslegra; að tala niðrandi til mótherjans og reyna að móðga hann, eða missa stjórn á skapi sínu í smá stund og stanga viðkomandi Annars er ég svo sem ekkert ósátt við að Ítalir hafi orðið heimsmeistarar. Meira að segja ég get viðurkennt að þeir voru með gott lið..

Helgin var bara nokkuð róleg og fín. Vinna á sunnudag og vinna og HM á laugardag. Pálmi og Ingvi kíktu við á leið sinni norður á sunnudeginum og horfðu á leikinn heima. Ég skrapp svo suður í gær og um kvöldið stoppaði Signý smá í sveitinni. Ég fór með Laufeyju og skoðaði nýju íbúðina á Grettisgötunni og lýst bara mjög vel á þetta allt saman.

Ég hef ákveðið að taka upp á þeirri nýbreytni að hafa vikulegt uppgjör. Jæja, þetta skýrir sig vonandi sjálft..

Bloggari vikunnar; Vafalaus Sara á http://merin.bloggar.is fyrir að koma sterk inn í bloggheiminn

Óduglegasti bloggari vikunnar; Pálmi Þór!!! á http://palmithor.bloggar.is Eins gott að þú komir með gott afmælisblogg

Skemmtilegasta commentið; Hahaha.. Sara, fyrir þetta hér; http://www.blog.central.is/gudruneik?page=comments&id=2044714 af margföldum krafti JÁ!

Nördalegasta commentið; Já ég ætla að heiðra sjálfa mig með þessum tiltli fyrir þetta hér; http://palmithor.bloggar.is/blogg/39718/#ath S.s. þriðja síðasta commentið. Kom með ansi mörg á þessa færslu

Fyndnasta bloggið; Konráð nokkur Þorleifsson á www.blog.central.is/menace Snilld

Skemmtilegasta nýbreytnin; Guðrún Gróa, fyrir að vera með mynd fyrir hvern dag í sumar; http://www.blog.central.is/gudrungroa?page=viewPage&id=900113

Ætli það sé ekki komið nóg af titlum í bili. Þeir verða að sjálfsögðu breytilegir, því að eins og fólk getur sagt sér eru ekkert alltaf skemmtileg komment eða nördaleg og þar fram eftir götunum.

Svo ætla að sjálfsögðu allir að fara á Stuðmannaball á Blönduósi um næstu helgi, er það ekki???

Guðrún Eik - Bloggar

Ég held svei mér þá að ég hafi aldrei verið svona mikið bleh á allri minni ævi.

Mig langar svo mikið á ball með Pöpunum að ég var nálægt því að bresta í grát áðan þegar ég heyrði auglýsingu með Írskum dögum á Akranesi um helgina. Ég hef einu sinni á ævinni farið á Papaball og það var geðveikt. Bölvað ball-leysi í allt sumar. Ég verð brjáluð ef að 17. helgarballið fellur niður eins og allt annað í þessum Guðsvolaða landshluta.

Já.. ég er dálítið bitur. Kannski af því að ég var alein í gær og verð það í dag? Kannski af því að ég er svefnlítil? Kannski af því að ég er að skrifa upp lista í Exel sem er nánast bara tölur og ég er alltaf að ruglast á línum og þetta tekur svo langan tíma, af því að ég er ekki eins fljót að skrifa tölur eins og texta?

Jæja, tölum um eitthvað skemmtilegra.. Ég horfi alveg ákaflega lítið á sjónvarp á sumrin. Held ég horfi á 3 þætti og HM, þannig að ég sest niður fyrir framan sjónvarpið um það bil 3 í viku, fyrir utan HM. Hef ekki kveikt á sjónvarpinu mínu í 3 vikur ef mér telst rétt til, bæði vegna þess að herbergið mitt er ógeðslegt og verra útlítandi en svínastýja og vegna þess að sjónvarpið frammi er miklu stærra og betra að horfa á það. Svo er líka leiðinlegt að horfa einn. Það má því búast við öflugu suði næst þegar ég kveiki á Hr. Telefunken.

En þeir 3 þættir sem ég horfi á eru:

LOST - Síðasti þátturinn á mánudaginn og hann verður vafalaust svakalegur. Hlakka til, en samt ekki, því ég vil ekki að þættirnir klárist

Desperate Housewives - Líka síðasti þátturinn þar á bæ næsta fimmtudag. (Ég held að mitt litla sjónvarpsgláp sé á hraðri niðurleið) Það er það sama og með Lost, hlakka til - en samt ekki

Projeckt Runway - Hversu mikil snilld? Ég trúi ekki að ég hafi látið heila þáttaröð fram hjá mér fara!! Þetta eru sem sagt ungir og upprennandi tískuhönnuðir sem fá ýmis konar verkefni og er einn sendur heim í hverri viku. Núna eru 6 hönnuðir eftir og ég held upp á 4 af þeim Alger snilld og hvet ég alla sem hafa ekki séð þessa þætti að tékka á þeim næsta miðvikudag klukkan rúmlega 8. (Komst reyndar að því fyrir slysni hver vinnur þessa þáttaröð, en ætla síður en svo að hætta að horfa)

Eftir að hafa horft á Project Runway held ég að það væri geggjað að verða hönnuður. Verst hvað ég er léleg að teikna og sauma Réðst samt í það að sauma mér bol sem ég teiknaði og er komin dálítið áleiðis. (Stórt afrek fyrir mig). Hlakka til að klára hann og vona að allt heppnist.

Fyrsta steypa í fuglahúsinu í morgun (loksins). Eða ég veit allavegan ekki betur. Var horfin af vettvangi áður en ég vissi meira. Búið að vera brjálað að gera heima síðustu daga og það er ekkert að fara að breytast.

Ég veit hvað ég geri til að ná mér upp úr depurðinni. Ég ætla að baka feita köku þegar ég kem heim. (Verður reyndar líklega ekki fyrr en ég er búin að mjólka) og svo ætla ég að horfa á dvd og borða nammi, fyrst að það er nú einu sinni nammidagur. Svo synnti ég líka 1 km. í gær Skellti mér í ljós með Eyrúnu og svo í sund. Stefni á að gera þetta að föstum lið.

Jæja, listinn bíður og ekki bætist við hann á meðan ég slugsa hér. Best að koma sér að verki.

Guðrún Eik - hrikalega bleh

Í alvöru talað fólk, hvað er málið að halda með Ítalíu? Ég er stórhneyksluð. Vona innilega að Frakkarnir taki súkkulaðismurðu pizzustrákana í nefið á sunnudaginn! Sveiattan..

Lítið hefur á daga mína drifið undanfarið. Ég er sem fyrr rifin á lappir milli 6:15 og 6:45 og er af þeim sökum oftast komin í rúmið fljótlega upp úr 11. Um daginn var ég svo keppnis-bóndi, eins og félagi Sindri myndi orða það, en þá var ég úti á túni að heyja til 11 - hálf 12. Glussakerfið á traktornum var svo eitthvað bilað, þannig að undir lokin þurfti ég á öllu mínu afli að halda til að geta snúi stýrinu. Þá borgaði sig að hafa krafta í kögglum

Í gær gladdist mitt litla hjarta mjög. Frakkar komnir í úrslitaleikinn og í hálfleik skrapp ég aðeins í tölvuna til að kíkja á póstinn minn. Beið mín þá ekki bréf frá Sindra Sæfara. Mér hlýnaði um hjartarætur og rak upp nokkrar hláturrokur á meðan lestrinum stóð. Ef að einhverjum leiðist í vinnunni (eins og mér) þá hvet ég viðkomandi til að senda mér eitt stykki tölvupóst og hver veit nema að hann fái eitt stk. hnyttið og skemmtilegt svarbréf Með blogginu "dó" tölvupóstuinn nánast og finnst mér tími til kominn að endurvekja hann

Undur og stórmerki áttu sér stað hérna um daginn. Á dauða mínum átti ég frekar von heldur en því sem gerðist, og trúið mér, ég er ekkert að fara að hrökkva uppaf Ein ólíklegasta manneskja til að stofna bloggsíðu og fara að blogga ákvað að nú væri tími til kominn að bloggheimurinn fengi að njóta skrifa hennar. Ég er að sjálfsögðu að tala um Söru Ólafsdóttur, en skrif hennar má finna á síðu með því frumlega nafni http://merin.bloggar.is Njótið vel.

Guðrún Eik - Viva la France

Fótbolti er stórkostlegur

Ég er sem sagt búin að jafna mig á áfallinu og spái Frökkum ennþá sigri. Ætla að veðja við Arnar Inga um það hvort að Portúgal eða Frakkland fari í úrslitaleikinn. Er búin að vera að hugsa um hvað sé best að veðja uppá, því að Arnar þvertekur fyrir það að veðja peningum. (Man sjálfsagt eftir 1000 kallinum sem ég hafði af honum í fyrra) Mér datt sú snilldarhugmynd í hug að ef að ég ynni myndi ég birta hér á blogginu afar skemmtilegt msn-samtal sem að átti sér stað milli mín og Arnars í fyrrasumar. Það er alveg bráðfyndið og búið að skemmta mér mjög í gegnum tíðina. Arnar Ingi er hins vegar alls ekki hrifinn af þessu samtali og vill helst ekki að það verði birt opinberlega. Ég hugsaði mér gott til glóðarinnar og skemmti mér yfir þessari tilhugsun í dálitla stund, eða þangað til ég fattaði að þetta var síður en svo góð hugmynd!! Ég gleymdi því að Arnar Ingi er með lífshættulegt og jafnvel bannvænt tromp uppi í erminni, sem hefur meðal annars gert það að verkum að ég hef ekki birt þetta samtal ennþá. Og þar sem ég er ekki tilbúin til að lýsa yfir heilögu stríði á hendur honum, ákváðum við að finna eitthvað annað til að veðja um. Allar tillögur vel þegnar.

Ég er búin að standa sjálfa mig að því í ófá skiptin á HM að hugsa; "Ohh.. hann er svo svalur" eða "Vá hann er svo góður" eða jafnvel "Hann er svo mikil snilld!".. Ég held sem sagt upp á frekar marga leikmenn. Ég ákvað að taka þetta saman og er komin með dágóðan lista. Þetta er sem sagt bara listi yfir uppáhöld og tengist getu ekki endilega í öllum tilvikum. Ég veit til dæmist alveg að Wayne Rooney er góður, en ég fíla hann bara ekki, þannig að hann er ekki á listanum Þið fáið meira að segja myndir með topp 10

 1) Thirerry Henry, Arsenal, Frakkland
 2) Pavel Nedved, Juventus, Tékkland
 3) Zinidane Zidane, Real Madrid, Frakkland
 4) Ronaldinho de Assis Moreira, Barcelona, Brasilía
 5) Patrick Viera, Juventus, Frakkland
 6) Luís Figo, Inter, Portúgal
 7) Michael Ballack, Chelsea, Þýskaland
 8 ) Ronaldo Luiz Nazário de Lima, Real Madrid, Brasilía
 9) Hendrik Larsson, Helsingborg, Svíþjóð
 10) Arjen Robben, Chelsea, Holland

11) Fredrik Ljungberg, Arsenal, Svíþjóð

12) Frank Lampard, Chelsea, England

13) Deco (Anderson Luiz de Sousa), Barcelona, Portúgal

14) Roberto Carlos, Real Madrid, Brasilía

15) Ashley Cole, Arsenal, England

16) Juan Roman Riquelme, Villareal, Argentína

17) Oliver Kahn, Bayern Munchen, Þýskaland

18 ) Frank Ribery, Marseille, Frakkland

19) Ricardo, Sporting, Portúgal

20) Robert Emmanuel Pires, Villareal, Frakkland

21) Jens Lehman, Arsenal, Þýskaland

22) Ze Roberto, Bayern Munchen, Brasilía

23) Giovanni Van Bronckhorst, Barcelona, Holland

24) Steven Gerrard, Liverpool, England

25) Nuno Gomes, Benfica, Portúgal

26) Robin Van Persie, Arsenal, Holland

27) Edwin Van Der Sar, Manchester United, Holland

28 ) Carlos Teves, Corinthians, Argentína

29) Christiano Ronaldo, Manchester United, Portúgal

30) Ian Koller, Borussia Dortmund, Tékkland

31) Gilberto Silva, Arsenal, Brasilía

32) Bastian Schweinsteiger, Bayern Munchen, Þýskaland

33) Sol Campbell, Arsenal, England

34) John Terry, Chelsea, England

35) Andriy Shevchenko, AC Milan, Úkraína

36) David James, Manchester City, England

37) Lionel Messi, Barcelona, Argentína

Þetta er svona nokkurn vegin röðin. Nenni ekki að pæla meira í þessu í bili. Best að enda þetta á einu stykku einkahúmor. Takk og bless

Spurning dagsins: Úr hvaða lagi er titillinn?

Guðrún Eik - Af margföldum krafti, já!

Ég veit hreinlega ekki hvort ég á að hlægja eða gráta

Stóð sjálfa mig að því að fagna báðum liðum í leiknum sem var að ljúka

Hélt samt með Brasilíu fyrir mót..

Þó að ég haldi líka með Frakklandi (Nei ég get aldrei valið bara eitt lið til að halda með) þá bjóst ég við að Brassarnir myndu rúlla þessu upp

Sannarlega óvænt úrslit miðað við allt og allt... nema þá kannski leikinn því að Frakkland voru alls ekki síðri en Brassarnir í þessum leik

Ég er nánast orðlaus yfir þessu öllu saman

Er meira að segja of slegin yfir þessu til að upphugsa titil

Ég ætla að breyta... Fyrst að Brasilía verða ekki heimsmeistarar þá verða Frakkar það

Taka Þjóðverja í úrslitunum

Blogga á mánudaginn.. Þegar ég er búin að jafna mig og komin í vinnuna

Guðrún - Í sjokki